Módelflug: Kafli 4

---

SMIÐI OG TILKEYRSLA MÓTORA

---

ÁHÖLD OG VERKFÆRI

Algengustu verkfæri sem notuð eru í módelsmíði

Sagt er að hægt sé að smíða flugmódel með nokkra bogna títuprjóna og brotið rakvélarblað ein að vopni. Allt um það þá fer ekki hjá því að því fleiri og betri verkfæri sem notuð eru því auðveldara er að smíða módelið upp að vissu marki -. Þau verkfæri og áhöld sem telja má nauðsynleg við módelsmíði eru:

1. SMÍÐAPLATA

Slétt, flöt plata, t.d. 22 mm spónaplata með trétex límt á til að auðvelt sé að festa á hana títuprjóna og teiknibólur. Það er algerlega nauðsynlegt að þessi plata sé bein og slétt. Það er ekki hægt að smíða rétt módel á undinni smíðaplötu. Best er að samlíma tvær spónaplötur og tvær trétex plötur. Þannig fæst óhagganleg smíðaplata. Fáðu vinalegt trésmíðaverkstæði til að ghera það í límpressu, þá verður allt eins og það á að vera

2. MÓDELHNÍFUR

Mikilvægt er að þægilegt sé að skera viðinn, bæði til að varast slys og einnig til að skurðurinn sé betri. X-acto hnífur nr. 1 með blaði nr. 11 er vinsælastur en til eru margar gerðir af hnífum sem hægt er að nota.

3. TÍTUPRJÓNAR

Títuprjónar eru notaðir til að halda hlutum á sínum stað á meðan límið er að þorna. Best er að þeir séu með stórum haus sem gott er að sjá og halda um. Þeir fást í tuskubúðum. Skoðaðu úrvalið þar, það eru til margar gerðir prjóna.

4. PÚSSIKUBBUR OG SANDPAPPÍR

Til að módelið líti sómasamlega út þarf að pússa það og það er best gert með góðum pússikubbi. Bæði er hægt að búa hann til úr lófastórum trékubbi og kaupa hann tilbúinn í næstu byggingavöruverlsun. Þar fæst einnig sandpappír í mörgum gerðum og getur komið sér vel að eiga til pappír af mismunandi grófleika, allt frá A80 til A400 (og jafnvel fínni).

5. ÖNNUR VERKFÆRI

Önnur verkfæri sem gæti komið sér vel að eiga eru lítil bakkasög, bogasög, balsahefill, safn af margvíslegum blöðum í hnífinn, um 15W lóðbolti, litlar þvingur og klemmur og borsveif. Annað er til á flestum heimilum eins og tangir, skrúflyklar og skrúfjárn af mörgum stærðum og gerðum, þvottaklemmur, límband o.s.frv. Rafmagnsverkfæri eins og Dremel fræsarar og rafmagnssagir eru ekki nauðsynleg svona til að byrja með en geta komið sér mjög vel ef mikið er smíðað og eru þá oft mikið notuð.