Hang-svifflugur eru yfirleitt með styttri vængi en hástartsvifflugur, þ.e.a.s. á bilinu 2,00-2,50 metra. Einng hafa þær vængsnið sem gefur minna lift en aukinn hraða. FLUGIÐ:Hér er svifflugunni kastað fram af brekkubrún og stendur flugmaðurinn í sömu sporum og þegar hann heldur á svifflugu í teygju, þannig að á þessu stigi er áríðandi að vera búinn að kveikja á tækjum og prófa öll stýri áður en kastað er. Kastað er beint inn í vindinn og módelinu haldið í uppstreyminu sem myndast er brekkan beygir vindinn upp á við. Uppstreymið fer eftir vindhraðanum og halla brekkunnar. Ekki þarf háa eða bratta brekku til að hægt sé að fljúga léttri svifflugu. Flestar svifflugur hanga best þegar vindhraðinn er 4-10 metrar á sekúndu á brekkubrúninni. Í meiri vindi er erfiðara að fljúga því uppstreymið verður meira og iður (turbulens) verða meiri og er módelið þá óstöðugra.
Í fyrstu flugunum skal módelið vera í því jafnvægi sem mælt er með á teikningum. Gangið úr skugga um að skýrisfletir séu í núllstöðu og að vængirnir séu rétt staðsettir. Kastið módelinu beint upp í vindinn með nefið frekar niður á við og vængina lárétta. EKKI KASTA MÓDELINU UPP Á VIÐ. Módelið rís mjög hratt ef uppstreymið er sterkt og þú skalt vera við því búinn að gefa niður á hæðarstýrinu til að það skríði á móti vindinum. Stilltu trimm á fjarstýringu þar til módelið flýgur lárétt. Beygðu síðan í aðra hvora áttina og fljúgðu samsíða brekkubrúninni. Eftir ca. 50 metra skaltu beygja upp í vindinn og fljúga í hina áttina. Venjulega er flogið í áttu, með báðar beigjurnar út frá brekkunni, upp í vindinn. Fylgstu vel með módelinu og stilltu trimmin til að varna því að það rísi of mikið. Ef módelið heldur áfram að rísa með fullt "niður trimm", skaltu lenda og bæta þyngd í nefið. Lending á brekkubrún krefst sérstakrar tækni og einbeitni. Þegar flogið er inn yfir brekkuna hverfur uppstreymið og iður og niðurstreymi eru algeng. Byrjaðu aðflugið hátt og snúðu vélinni beint upp í vindinn og haltu henni í grunnri dýfu til að missa ekki hraðann. Í um eins meters hæð skaltu fleyta vélinni úr dýfunni til að minnka hraðann og keyra hana svo niður með því að gefa smávegis niður á hæðarstýrinu. Ef módelið er of hátt eða á of mkilum hraða skaltu láta það fljúga fram af brúninni og reyna aftur. Það er betra en að brjóta sviffluguna.    |
Úr „Módelflug“ | |||||
